Umsækjendur skulu hafa íslenska kennitölu og starfa sem atvinnufólk í sviðslistum. Ef aðeins hluti þátttakenda í verkefni uppfyllir þessa kröfu og verulegur hluti ekki, verður að leggja áherslu á hvernig verkefnið stuðli að eflingu íslensks sviðslistalífs.

Ferðastyrkir eru ætlaðir sjálfstætt starfandi sviðslistafólki og styrkir ekki verkefni sem framleidd eru af opinberum stofnunum eða séreignarstofnunum sem reknar eru með opinberu framlagi.

Styrkir eru veittir til sviðslistafólks á sýningaferðalögum sem miða að því að vekja áhuga, auka sýnileika og eftirspurn eftir sviðsverkum.
‍
Innanlands: Styrkir eru veittir fyrir sýningaferðalög sem miða að því að ná til nýrra áhorfenda og efla menningarlegt aðgengi á landsvísu.
Erlendis: Styrkir miðast við þátttöku í viðburðum sem miða að því að vekja áhuga, auka sýnileika og eftirspurn sviðslistaverka utan Íslands

Styrkupphæðir:
Innanlands
50.000 kr á þátttakanda.
Að hámarki 300.000 kr fyrir hvert verkefni.
Erlendis
75.000 kr fyrir ferðir innan Evrópu.
100.000 kr fyrir ferðir utan Evrópu.
Að hámarki 600.000 kr fyrir hvert verkefni.
‍
Ekki eru veittir styrkir í:
- Þátttöku í vinnustofum (residensíur)
- Þátttöku á námskeiðum eða námsferðum
- Þátttöku í erlendum verkefnum sem eru alfarið framleidd og styrkt af erlendum aðilum.

Opið er fyrir umsóknir um ferðastyrki allan ársins hring, en þær eru teknar til afgreiðslu þrisvar sinnum á ári hjá fagráði. Umsóknarfrestur er síðasti virki dagur í janúar, maí og september.

‍Gildistími ferða: Umsóknir geta tekið til ferða sem þegar hafa átt sér stað innan yfirstandandi tímabils, eru í gangi eða áætlaðar síðar. Hvert tímabil reiknast frá lokum síðasta umsóknarfrests fram að þeim næsta:
‍
‍Janúar-frestur (30. janúar 2026): Tekur til ferða sem farnar eru frá 1. október og fram í tímann.
‍Maí-frestur (29. maí 2026): Tekur til ferða sem farnar eru frá 1. febrúar og fam í tímann.
‍September-frestur (30. september 2026): Tekur til ferða sem farnar eru frá 1. júní og fram í tímann.

Athugið: Aðeins má úthluta einum ferðastyrk á hvern umsækjanda eða hóp á hverju umsóknartímabili.

Fagráð Sviðslistamiðstöðvar er skipað fulltrúum frá SAFAS – Samráðsvettvangi fagfélaga í sviðslistum. Umsóknir eru metnar út frá listrænum gæðum, fagmennsku og því hversu vel þær falla að markmiðum ferðastyrkja um að vekja áhuga, auka sýnileika og eftirspurn eftir sviðslistaverkum. Matið tekur jafnt til sýnileika á alþjóðlegum vettvangi sem og gildi þess að efla útbreiðslu og aðgengi að sviðslistum um allt land. Jafnframt er horft til þess að tryggja fjölbreytni listforma í úthlutunum hvers tímabils og hvernig verkefni styðja við sjónarmið um inngildingu.
‍
Aðalfulltrúar:
Aðalbjörg Árnadóttir
Andri Björn Róbertsson
Rebekka A. Ingimundardóttir

Varafulltrúar:
Friðþjófur Þorsteinsson
Tinna Grétarsdóttir
Þóra Einarsdóttir

Vinsamlegast athugið að ferðastyrkir Sviðslistamiðstöðvar eru samkeppnisstyrkir. Vegna takmarkaðs fjármagns er ekki unnt að tryggja að allar umsóknir hljóti brautargengi, jafnvel þótt þær uppfylli öll formleg skilyrði. Fagráð leggur heildstætt mat á hverja umsóknarfrest út frá fyrirliggjandi fjármagni og þeim umsóknum sem berast hverju sinni.

Sótt er um í netumsókn.

Í umsókn skal tilgreina upplýsingar um umsækjanda, verkefni, aðstandendur, tilgang og tilhögun ferðar.

Boðsbréf frá sýningarstað eða hátíð verður að fylgja umsókn eða önnur gögn sem staðfesta þátttöku sviðslistahóps á hátíð eða öðrum viðburðum sem hafa það að markmiði að fjölga tækifærum og auka sýnileika viðkomandi sviðslistahóps.

Fjárhagsáætlun vegna fyrirhugaðrar ferðar verður að fylgja umsókn, annars er hún ekki tekin til greina. Athugið að ekki er óskað eftir fjárhagsáætlun vegna framleiðslu sýningar heldur einungis tekjum og kostnaði tengdum ferðalagi.  Vinsamlegast fyllið út fjárhagsáætlun sem má hlaða niður HÉR og setjið í viðhengi í umsókn.

Sækja um ferðstyrk hér

Svör við umsóknum um ferðastyrki berast með tölvupósti í síðasta lagi 4 vikum eftir að umsóknarfrestur rennur út.

Ferðastyrkurinn er greiddur við úthlutun. Umsókn skal berast áður en viðburður fer fram. Sviðslistamiðstöð skuldbindur sig til að fara með öll gögn tengd umsóknum sem fyllsta trúnaðarmál.

Falli ferð niður skal tilkynna það til Sviðslistamiðstöðvar og mun þá styrkurinn falla niður.

Lokaskýrslu skal skila innan 2 mánaða frá lokum ferðalags.
‍
Skýrslan er útfyllt á netinu á Google Forms og má nálgast hér að neðan.

Í lokaskýrslu þarf að koma fram stutt samantekt um ferðina og hvernig hún náði markmiðum ferðastyrkja, upplýsingar um fjölda sýninga og fjölda áhorfenda og mynd(ir) úr sýningarferðalagi til opinberar birtingar.

Við bendum á að ekki er hægt að senda inn nýjar umsóknir ef lokaskýrslu hefur ekki verið skilað fyrir skilafrest.

Lokaskýrsla til útfyllingar