Þýðingastyrkir Sviðslistamiðstöðvar Íslands

Markmið þýðingarstyrkja er að auka sýnileika íslenskra leikrita og sviðslistaverka erlendis, vekja áhuga á verkunum og skapa þeim ný alþjóðleg tækifæri.

Styrkirnir eru ætlaðir til þýðinga á frumsömdum íslenskum leikritum og öðrum textabundnum sviðslistaverkum yfir á önnur tungumál. Verkið þarf að hafa verið frumsýnt á Íslandi áður en sótt er um.

Einnig er hægt að sækja um styrk til textunar íslensks sviðslistaverks vegna sýninga erlendis.

Þýðing þarf ekki að tengjast þegar staðfestri sýningu erlendis. Styrkja má þýðingu sem er ætluð til alþjóðlegrar kynningar, dreifingar og tengslamyndunar, enda liggi fyrir skýr og raunhæf áætlun um hvernig þýðingin verði nýtt.

• Verkið skal hafa verið frumsýnt á Íslandi.
• Þýðingin skal unnin beint úr íslensku.
• Höfundur eða rétthafi skal hafa samþykkt þýðinguna og val á þýðanda.
• Þýðandi skal hafa viðeigandi reynslu og hæfni til verksins.
• Æskilegt er að þýðandi hafi tungumálið sem þýtt er á að móðurmáli eða sambærilega færni.
• Umsækjandi skal leggja fram greinargerð um fyrirhugaða kynningu, dreifingu og nýtingu þýðingarinnar.

Vilyrði, boð eða staðfestur áhugi frá erlendum sýningarstað, framleiðanda, hátíð, umboðsaðila eða öðrum samstarfsaðila getur styrkt umsókn en er ekki skilyrði.

Að jafnaði eru veittir styrkir til allt að þriggja verkefna í hverri úthlutun.

Við ákvörðun styrkupphæðar er miðað við 3,75 kr. fyrir hvert stafabil í íslenskum frumtexta. Með stafabili er átt við öll slög í textanum, þar með talin bil.

Hámarksstyrkur fyrir einstakt verkefni er 325.000 kr.

‍Stafafjöldi er grunnviðmið við ákvörðun styrkupphæðar en fagráð getur vikið frá því þegar eðli þýðingarvinnunnar gefur sérstakt tilefni til, til dæmis vegna bundins máls, söngtexta eða annarra atriða sem gera þýðinguna sérstaklega tímafreka eða flókna.

Einnig er tekið mið af samningsbundnum kostnaði við þýðinguna. Styrkur getur aldrei verið hærri en sá kostnaður sem fram kemur í samningi við þýðanda.

Heildarfjárhæð sem er til ráðstöfunar í hverri úthlutun er 750.000 kr.

Ef samanlögð viðmiðunarfjárhæð þeirra verkefna sem fagráð leggur til að styrkja er hærri en það fjármagn sem er til ráðstöfunar getur þurft að lækka einstaka styrki.

Sviðslistamiðstöð fullfjármagnar að jafnaði ekki þýðingar.

Fagráð Sviðslistamiðstöðvar metur umsóknir og leggur fram tillögur um úthlutun.

Við mat er meðal annars litið til:
‍

• listræns og faglegs styrks verksins,
• möguleika þess til alþjóðlegrar kynningar, dreifingar og samstarfs,
• gæða og trúverðugleika áætlunar um nýtingu þýðingarinnar,
• reynslu og hæfni þýðanda,
• hvort fyrir liggi erlendur áhugi eða raunhæf leið að erlendum samstarfsaðilum,
• samningsbundins kostnaðar við þýðinguna,

Við mat skal ekki einungis horft til þess hvort fyrir liggi staðfest sýning erlendis. Þýðing sem ætlað er að skapa aðgang að nýjum mörkuðum, samstarfsaðilum eða sýningartækifærum getur einnig fallið vel að markmiðum styrkjanna.

Eftirfarandi gögn og upplýsingar skulu fylgja umsókn:
‍

• greinargóð samantekt á verkinu, efni þess, formi og listrænni nálgun,
• upplýsingar um frumsýningu og sýningarsögu,
• handrit verksins á íslensku,
• fjöldi stafabila í íslenskum frumtexta, að meðtöldum bilum,
• greinargerð um fyrirhugaða kynningu, dreifingu og nýtingu þýðingarinnar,
• upplýsingar um sérstakar áskoranir við þýðingu verksins, ef við á,
• samþykki höfundar eða rétthafa fyrir þýðingu og vali á þýðanda,ferilskrá þýðanda,
• undirritaður samningur við þýðanda þar sem kostnaður við þýðinguna kemur fram.

Umsækjandi getur einnig veitt upplýsingar um umfjöllun, verðlaun eða tilnefningar sem verkið hefur hlotið. Ef fyrir liggur vilyrði, boð eða önnur staðfesting á áhuga erlends samstarfsaðila er æskilegt að það fylgi umsókn.

Umsækjendum er tilkynnt um niðurstöðu með tölvupósti eigi síðar en fjórum vikum eftir að umsóknarfresti lýkur.
70% styrks er greitt við upphaf verkefnis og 30% þegar fullbúinni þýðingu hefur verið skilað til Sviðslistamiðstöðvar og lokaskil samþykkt.

Þýðingu skal að jafnaði lokið innan sex mánaða frá styrkveitingu. Sviðslistamiðstöð og fagráð fara með umsóknir og fylgigögn sem trúnaðarmál.

Fullbúinni þýðingu skal skila til Sviðslistamiðstöðvar að verkefni loknu. Umsækjandi skal upplýsa Sviðslistamiðstöð ef þýðingin leiðir til sýningar, leiklestrar, kynningar, útgáfu eða annars alþjóðlegs samstarfs.

Ekki er hægt að sækja um nýjan þýðingarstyrk fyrr en fyrra styrkveittu þýðingarverkefni hefur verið lokið og lokaskil samþykkt.

Sviðslistamiðstöð og fagráð fara með umsóknir og fylgigögn sem trúnaðarmál.