Opið Kall — Icelandic Dance Showcase 2026

Sviðslistamiðstöð Íslands, í samstarfi við Íslandsstofu, Reykjavík Dance Festival, Íslenska dansflokkinn og Dansverkstæðið, auglýsir eftir umsóknum frá danshöfundum og listafólki sem vinnur með líkamann sem sinn helsta miðil til þátttöku í Icelandic Dance Showcase 2026.

Viðburðurinn fer fram innan ramma Reykjavík Dance Festival 2026 (11.–15. nóvember) og er ætlað að styrkja alþjóðlegan sýnileika íslenskrar danslistar í kjölfar þess að ICE HOT Nordic Dance Platform var aflýst árið 2026.

Icelandic Dance Showcase er nýtt framtak sem hannað er til að efla alþjóðlegan sýnileika og dreifingu íslenskra dansverka. Markmiðið er að styðja við listafólk í að þróa alþjóðlegar áherslur varðandi framsetningu og ferðalög verka sinna. Vettvangurinn styður bæði við sýningarferðalög og uppbyggingu alþjóðlegs samstarfs til lengri tíma.

Á showcase-inu verður boðið upp á valin verk í þremur formum — sýningar í fullri lengd, stutt sýnishorn/valin brot (demos) og kynningar (pitch presentations) — fyrir boðsgesti úr röðum listrænna stjórnenda hátíða og sýningarstaða, menningarblaðamanna, auk áhorfenda Reykjavík Dance Festival.

Samhliða showcase-inu verður boðið upp á sérsniðna dagskrá fyrir alþjóðlega gesti sem tengir listafólk og samtök í íslenska dansgeiranum við listræna stjórnendur og aðra fagaðila í gegnum fundi, kynningar og tengslamyndun.

Hvað felst í þátttöku?

Listafólk sem valið verður til þátttöku verður hluti af dagskrá Icelandic Dance Showcase á Reykjavík Dance Festival 2026 og hluti af alþjóðlegu gestadagskránni.

Þátttaka felur í sér:

• Þátttaka á Reykjavík Dance Festival 2026 (11.–15. nóvember): Verkin geta verið kynnt sem sýningar í fullri lengd, sýnishorn/brot eða sem pitch.
• Þóknun fyrir þátttöku: Listafólk sem valið er fær greidda þóknun upp á 200.000 kr. fyrir sýningu í fullri lengd. Takmarkaður fjöldi styttri kynninga (demos) verður í boði gegn 100.000 kr. greiðslu. Frekari stuðningur kann að koma til greina í sérstökum tilfellum, einkum hvað varðar ferðakostnað og umfang verkefna.
• Alþjóðlegur sýnileiki og kynning: Valin verk verða hluti af kynningarefni sem unnið er fyrir innlenda og erlenda gesti, svo sem listræna stjórnendur og menningarblaðamenn.
• Fundir og tengslamyndun: Tækifæri til að hitta og kynna verk fyrir boðsgestum.
• Eftirfylgni: Showcase-ið felur í sér stuðningskerfi sem ætlað er að auðvelda sýningaferðir og alþjóðlegt samstarf í kjölfar viðburðarins.

Hver geta sótt um?

• Danshöfundar og listafólk sem vinnur með dans og líkamann sem sinn helsta miðil.
• Listafólk með íslenska kennitölu. Erlendir samstarfsaðilar geta verið þátttakendur í völdum verkefnum.

Sækja má um með:

• Ný verk sem eru frumsýnd árið 2026
• Ný verk í þróun (þ.m.t. sýnishorn eða pitch)
• Aðlöguð eða endurunnin verk með áherslu á alþjóðlegt sýningarumhverfi
  

Hvatt er til umsókna frá jafnt upprennandi sem rótgrónu listafólki. Umsækjendur eru hvattir til að huga að framsetningu og tæknilegum lausnum sem henta fyrir sýningarferðalög og ólíkar aðstæður.

Viðmið og áheyrslur
Umsóknir verða metnar út frá:

• listrænum gæðum og hugmyndalegum styrk,
• skýrri listrænni nálgun og sýn,
• framkvæmdanleika verksins innan ramma hátíðarinnar,
• möguleikum á alþjóðlegum sýningarferðum, samstarfi eða dreifingu,
  því hvernig verkið auðgar flóruna í íslenskri danslist.

Valið er í höndum nefndar skipaðrar fulltrúum samstarfsaðila og sérfræðingum.

‍

Umsóknarfrestur 10. apríl 2026
Umsóknir skulu sendar í gegnum rafrænt umsóknareyðublað. Athugið að umsóknarform er á ensku.

‍

SÆKJA UM HÉR

‍