Þegar sviðin verða að lundabúðum
Nýr þáttur á ensku af Sviðsljósinu með pallborði frá SIBMAS-ráðstefnunni
„What used to be an empty space downtown … those places are now selling puffins.“
Þannig lýsti Snæbjörn Brynjarsson, leikhússtjóri Tjarnarbíós, einni af stærstu breytingunum sem orðið hafa á starfsumhverfi sjálfstæðra sviðslista í Reykjavík á undanförnum árum.
Orðin féllu á opnu pallborði um stöðu sjálfstæðra sviðslista á Íslandi sem fram fór í Iðnó í tengslum við alþjóðlegu SIBMAS-ráðstefnuna í júní. Ráðstefnan var haldin af Leikminjasafni Íslands við Landsbókasafn Íslands – Háskólabókasafn undir stjórn Sigríðar Jónsdóttur, verkefnastjóra Leikminjasafns.
Umræðunum stjórnaði Salka Guðmundsdóttir leikskáld og þýðandi. Með henni sátu Snæbjörn Brynjarsson, leikhússtjóri Tjarnarbíós, Aðalbjörg Árnadóttir leikstjóri og leikkona og Anna María Tómasdóttir leikstjóri.
Á pallborðinu var rætt um þróun sjálfstæðrar sviðslistasenunnar á Íslandi, skort á æfinga- og sýningarrými, samkeppni um opinbert fjármagn, fyrirhugaða sviðslistastefnu, alþjóðlegt samstarf og mikilvægi þess að varðveita sögu íslenskra sviðslista. Þrátt fyrir krefjandi starfsumhverfi var umræðan jafnframt full af húmor, bjartsýni og trú á framtíð sjálfstæðu senunnar.
Eftirminnileg var einnig athugasemd Snæbjörns um fjölbreytni verkefna sem berast Tjarnarbíói:
“Most applications to show in Tjarnarbíó are completely unmarketable and almost impossible to perform. So there are still really unpractical dreamers on the scene.”
Með góðfúslegu leyfi Leikminjasafns Íslands birtir Sviðslistamiðstöð Íslands nú upptöku af pallborðinu sem sérstakan þátt á ensku í hlaðvarpinu Sviðsljósið. Þar gefst hlustendum tækifæri til að kynnast af eigin raun líflegri og hreinskilinni umræðu um stöðu, áskoranir og framtíð sjálfstæðra sviðslista á Íslandi.
