Auglýst eftir listrænum stjórnanda fyrir Grímuna 2026

SviðslistasambandÍslands óskar eftir listrænum stjórnanda fyrir Grímuna 2026.
Gríman - íslensku sviðslistaverðlaunin verða haldin í Þjóðleikhúsinu þann 26.Maí næstkomandi og sýnd í beinni útsendingu á RÚV.

Gríman eruppskeruhátíð íslenskra sviðslista og ein helsta viðurkenning innan greinarinnar.
Á hátíðinni eru veitt verðlaun fyrir framúrskarandi árangur í sviðslistum á liðnu leikári. Sviðslistasamband Íslands stendur fyrir hátíðinni í samstarfi við aðildarfélög sín, stofnanir og RÚV, með það að markmiði að skapa glæsilega, faglega og eftirminnilega hátíð.

Hlutverk listræns stjórnanda

Listrænn stjórnandi ber ábyrgð á listrænni heildarsýn og framkvæmd hátíðarinnar í nánu samstarfi við verkefnastjóra Grímunnar, RÚV og gestgjafaleikhús. Starfið felur í sér að móta listrænt yfirbragð hátíðarinnar og samhæfa listræna þætti hennar frá undirbúningi til framkvæmdar.

Helstu verkefni eru meðal annars að:

●      móta listræna sýn hátíðarinnar, þar á meðal sviðsmynd, stemningu og dagskrárflæði

●      velja og vinna með listafólki, verðlaunakynnum og öðrum þátttakendum

●      hafa umsjón með skemmtiatriðum og innslögum, þar á meðal undirbúningi og leikstjórn innlestrar tilnefninga í samstarfi við RÚV

●      vinna náið með framleiðslu, tækniteymi RÚV og starfsfólki gestgjafaleikhúss

●      taka þátt í skipulagningu æfinga og tryggja faglega og heildstæða framkvæmd hátíðarinnar

Listrænn stjórnandi heyrir undir stjórn Sviðslistasambands Íslands og vinnur náið með verkefnastjóra Grímunnar og forseta sambandsins.

Hæfniskröfur

Leitað er að einstaklingi sem:

●      hefur reynslu af sviðslistum, viðburðargerð og/eða listrænni stjórn

●      býr yfir sterkri listrænni sýn og góðum samskiptahæfileikum

●      getur unnið sjálfstætt og af frumkvæði, sem og í nánu samstarfi við fjölbreytt teymi

●      er skipulagður og getur haldið utan um mörg verkefni samtímis

●      hefur góða yfirsýn og skilning á verkaskiptingu og ábyrgð innan listrænnar framleiðslu

Um er að ræða tímabundið verkefni á tímabilinu mars til lok maí 2026. Vinnuálag er breytilegt á tímabilinu og eykst þegar nær dregur hátíð.

Umsóknum, ásamt ferilskrá og stuttri kynningu á umsækjanda, skal senda á
svidslistasambandislands@gmail.com

merkt: Listrænnstjórnandi – Gríman 2026

Umsóknarfrestur er til og með 28. febrúar 2026.

‍